जोडीदार मज निर्व्यसनीच हवा, महाराष्ट्राच्या लेकींचा एल्गार

आईबाबा मला नको बंगला गाडी, फक्त शोधा व्यसनमुक्त गडी
 
 मुंबई (विनोद चव्हाण)व्हँलेंटाईन डे च्या निमित्तानं १३ फेब्रुवारी २०२० रोजी नरिमन पाँईंट येथे जोडीदार मज निर्व्यसनीच हवा या संदेशाचे घोड्यावर स्वार महाराष्ट्राच्या लेकींनी ढोलकी वादक यांच्या समवेत ढोल ताशांच्या तालावर वरात काढुन व्यसनमुक्तीचा प्रचार केला. यांत मुंबईतील राष्ट्रीय सेवा योजनेचे विद्यार्थी, मुंबईतील व्यसनमुक्तीपर कार्य करणाऱ्या संस्थांचे प्रतिनिधी, नशाबंदी मंडळाचे पदाधिकारी, संघटक, स्वयंसेवक यांच्या सहकार्याने कार्यक्रम पार पडला.

   व्यसन म्हणजे प्रेमाचा शत्रू. कारण प्रेम हे अनंत काळाची साथ तर व्यसन हे थोड्या वेळाची करमनुक असते. मानवी जिवनाचा अविभाज्य भाग म्हणजे प्रेम. मनाचा व शरिराचा सुंदर बंध म्हणजे प्रेम. हेच बंध अडीअडचणीत दुःखात आधार ठरतात. व्यसने आधारापोटी कवठाळली जातात परंतु व्यसने ही आधार नाहीत हे समजुन घेतले पाहिजे. जी व्यक्ती व्यसनांना आधार मानते त्यांच्या आयुष्यातील प्रमाचा भक्कम आधार आपणांस ढासळताना दिसत असतो.

    व्यसनाधिनतेकडे वाढत चाललेली युवकांची वाटचाल थांबविण्याच्या उद्देशाने या दिलखुलास कार्यक्रमाचेआयोजन नशाबंदी मंडळ महाराष्ट्र राज्यच्या वतीने करण्यात आले होते. सदर संदेश एकाच वेळी देण्याच्या उद्देशाने मुंबईसह संपुर्ण महाराष्ट्रात प्रेम करा मात्र जोडीदार निर्व्यसनीच निवडा हा संदेश महाराष्ट्रातील लेकी रस्त्यावर उतरुन देत असल्याची माहिती देत हा व्यसनमुक्तीचा लढा यापुढे अखंडपणे चालु राहील असे सांगत व्यसनमुक्त जीवनच सुखसमृध्द बनवु शकते म्हणुन निर्व्यसनी आयुष्याची कास धरली पाहिजे असे मत मंडळाच्या सरचिटणीस वर्षा विद्या विलास यांनी व्यक्त केले 

   याप्रसंगी नशाबंदी मंडळाने अभिनेते सिध्दार्थ जाधव, मकरंद अनासपुरे, स्वप्निल जोशी, दिलीप प्रभावळकर, देवदत्त नागे, जयवंत भालेकर आणि अभिनेत्री प्रिया बापट यांच्या प्रेमाच्या विचारांचे व्यसनमुक्तीपर प्रचार पत्रकांचे वाटप करण्यात आले. ज्यात निर्व्यसनी जोडीदाराच्या आवश्यकतेचे महत्त्व विशद करण्यात आले होते. मंडळाच्या सरचिटणीस वर्षा विद्या विलास यांनी उपस्थित तरुण तरुणींना व्यसनमुक्तीची शपथ दिली. ज्यात मुंबईतील उपस्थित तरुण तरुणींनी आईबाबा मला नको बंगला गाडी फक्त शोधा व्यसनमुक्त गडी हा संकल्प दिला